يا سادة يا مادة يثيتني ويثبتكم على الشهادة كيما تعرفوا إللى الحصول على مسكن يمثل حلم كل شاب تونسي وبالمناسبة ما نعرفش علاش الإحصائيات تقول إللي أكثر من 80 بالمائة من التونسيين مالكين ويظهرلي هذا معدل معناها إللى عندو عشرة مساكن يخرجوا في الإحصائيات 10 مواطنين مالكين. على كل حال حرت وحار دليلي وأنا محسوب حوم تونس الكبرى درتها باش نشري دار حاضرة ويا خويا بصراحة الاسوام ما تتقربش وكمل معرض الشرقسة كمل على ما بيا ثمة باعث عقاري في جهة قرطاج وإلا البحيرة يقدم المتر مربع المغطي ب2000 دينار يا بورب وبالله كل واحد يحسب قداش يفضل في الشهر وقداش يلزموا باش يكسب ميترو مربع اللطف. أما هذا ما ينفيش أنو المعدل بين 900 و1100 دينار بالنسبة للبقية. أنا بصراحة صرفت النظر على إقتناء الحاضر خاصة وأني نحب نشري فيلا على خاطر العائلة تبارك الله وماشاء الله. مخ الهدرة نصحوني جماعة بمنطقة النخيلات وفي وقت قياسي خدمت الريزوات ولقيت حويجة على الطريق الرئيسي بجانب حي الاساتذة لمن يعرف المكان. هو بصراحة من ناحية حركة المرور والسيولة والإنسياب وما شابهها ما ثماش مشكل على خاطر 5 دقائق وتلقى روحك في الطريق السريعة ولكن المشكل وأنو الحي من ناحية البنية التحتية مازال موش مهيأ رغم وجود الماء والتلفون وخدمات التطهير وأكد لى بعض المتساكنين وأنوا المنطقة منطقة مستقبل وستشتعل الاسعار تقريبا بالمناسبة ثمن المتر 100 دينار وكما أشرت فهي تطل على شارع رئيسي وبالتالي يمكن إستغلالها تجاريا مع العلم وأن مساحة قطعة الأرض في حدود 320 متر مربع وهي غير بعيدة عن المركب الرياضى متاع برج الوزير والمعطيات تقول أنه سيم ربط هذا الطريق الذي ينطلق من طريق رواد على مستوى أخر ضوء تقاطع قبل مركب الغزالة ويشق كامل منطقة النخيلات بطريق سكرة نعرف إللى االمشاريع هاذي تنجم تاخوا بالقليل 3 سنوات لكن حبيت نسألكم معشر المدونين والمدونات هل تعتقدون وأن النخيلات منطقة إستثمار في المستقبل القريب وبالتالي الواحد يتوكل يشري مخ الهدرة بجميع المعطيات إللى قدمتها لوكان جيت في بلاصتي تشري وإلا لا مع الملاحظة وأنوا ما عنديش مشكلة في البني بإعتبار عندى شكون ينجم ياقف للمرمة ومتفرغ. هذه جميع المعطيات ونهديلكم في الختام أغنية سيد أحمد حمزة كانك صاحبي دبر عليا
7 commentaires:
برجولية مادام عندك شكون واقف على المرمّة كلّمو عليّ يخدّمني في الويكاند راهي إيدي خفيفة في التلبيس و التفرطيس
آما برجولية : قتلك رأيي في المسألة ، المروج موش دوني وبلاصة نظيفة و مازالت فيه فرص
وإذا كان ما يساعدكش لازمك تخدّم في بلاصة الريزو عشرة ريزوات باش تلقى الفرصة الذهبية
وكان الله في العون
وا فهمتش أعلاش ديما اتحبوا كان اتشككوا في الدولة و في الإحصائيات. بالكشي اللي يحكموا فينا هوما محتليّن؟؟؟؟؟ أنا ننصحك قبل ما تتكتب تطّلع على المعلومة و تلوّج عليها و معهد الإحصاء و المعهد الوطني للدراسات الاستراتيجية قدّامك. امشيلهم و اسئلهم على طريقة الإحصاء لأنها طريقة تاخذ عدّة اعتبارات مجرّدة
أما فيما يخص الأسوام، أنا نعتقد إنو المواطن لازموا يمشي قد خطوتو. إذا إنت ماكاش قادر تشري في قرطاج و إلا البحيرة، آش لزّك تمشي لغادي؟ صحيح انشاءالله ربي يفتح عليك و تسكن في بلاصة كيما هكّاكا لكن إذا إنت أموروك المادية متوسطة، عيش على قد خطوتك. غيرو عندو الفلوس يشري حتى في القملرة، شنوة المشكلة؟ ربي يزيدو و ربي يفتح عليك
أما بالنسبة للبلاصة الل حكيت عليها، إذا إنت راضي عليها، شنوة المشكل؟ إشري و إملك غادي. ظاهرلي البلاصة أنا عرفتها. و أعتقد إنو أكيد باش تصير تهيئة البنية التحتية لكن بعد ما تكمل البناءات على خاطر، كان أنا مش غالط، فمة برشة بني غادي متاع مركبات سكنية. نتصور إنو أكيد بعد ما توفا يعملو الطريق
و إذا ما تمش الطريق، أنا ننصحك تعملو لوبي متاع سكان و تحضروا الاجتماعات التحضيرية للمجلس البلدي على خاطر القانون يعطي الحق للمواطن باش يحضر أعمال المجلس التحضيري و يعطيه الحق باش يتكلم. وقتها أطرحوا المشكلة على المجلس البلدي و اسمعوا شنوة يقوللكم. إذا كوّنوا لجنة، تبّعوا الحكاية
من بعد أحضروا أعمال المجلس البلدي (و لكن لنّا يمنع عليكم الكلام) المهم شوفوا ياهالترا المجلس خذا بماطالبكم و قدّم في الأعمال و إلا لا باش وقتها تعرفوا اشنوة تعملوا
المهم أصدم. على خاطر هاك تشوف الأسوام قعدا ترتفع. و ديما باهي كي تربح عقّار مهما كانت بلاصتو. و كان لزم ابني زوز طوابق. واحد اسكن فيه وواحد اكريه. و إلا اشري أرض مجاورة و اعمللها سور. نهار آخر تربحها و يربحوها الولاد
إذا لقيت إنو البلاصو الوحيدة اللي قد فلوسك و تساعدك في النقل اصدم و ديما أغزر للقدام مش للتوّا و ربي معاك
ya khouya manas7ekech, li 2annha mantqa teqef 3la el 7oudoud m3a 7ay el akrad el 3adhim!
we zid aleha el nkhilet 3andha au moins 15 ans we heya akeka we malgre eli feha villas modhkhma, t7ebhom tawa yroddouha 7ay mo3tabar ?
we 7keyet el tijara rahi m3abbya bettijara lin walla sakan fawdhai jemla.
Asslèma,
Ana na3rafha ennkhilète,Dar Baba juste wéraha, Nahj el Jawhéra. Mais je ne connais pas Hay el asadha, khaterni à l'etranger andi modda. Un conseil, barra chouf finou le terrain bethabit d'un point de vue voisinage, khater Allah yoltif surout fi Essif, les bagarres, les vols, la nuisance. Je parle de Nahj el Jawhéra, l'infrastructure il ne faut pas trop y croire, Imchi chouf bé3inik, pas une seule fois mais à plusieurs reprises et dans des heures differentes. Le coté + el quorb avec le pon + l'autoroute c'est vrai c'est un atout.
عالسلامة يا أمين مازال بكري على الاتفرطيس أما لو كان حاجتنا بفرطاس إنت الفرطاس الأول إلي نعيطولوا
ديانا ماقزين:
عايش خويا وإلا أختي أنا ما شككتش في الغحصائيات وإنما ظهرتلي الحكاية غريبة وثمة فرق بين التشكيك وإبداء الإستغراب لأنو الرقم ينجم يكون صحيح ولكن يثير الإستغراب وبالنيبة لمعهد الدراسات الغستراتيجية على حد علمي ما عملش دراسة إستراتيجية حول قطاع السكن في تونس . أما في خصوص الاسعار أنا ما عندى حتى مشكلة أما متر مربع ب2200د بصراحة موش نورمال حتى للي عندو فلوس على خاطر الديار إللى تتباه بمليار فما فوق المساحة هي إللى تخللى السوم غالي أما تصور شقة بماتين وأربعون مليون. مايقلقنيش أنو فما شكون يشرى أنا عطيت مجرد رأي وما قلتش أنا نحب نسكن في قرطاج وإلا البحيرة بعيدا عن ذلك فأنا طموحاتي أكبر وما عندى حتى مشكلة من ناحية الوضعية المالية وإنما طلبا للنصيحة باش الواحد يزيد يتشجع وبره وعلى كل حال بارك الله فيك وفي كل من خط حرفا
موضوعك ساهل و صعيب في نفس الوقت
من حيث شراء الأرض أنصحك بتقديرا جيدا لأمكانياتك المادية قبل المغامرة
تثبت من صبغة الأرض "يعني رد بالك من الشراء بالحبل" يعني أرض فلاحية قسمها صاحبها و بدى يبيع على الشياع و من بعد الشاري لا يحصل على رخصة بناء
ثانيا شراء الأرض و بناءها
فالأسعار غالية
و متطلبات المرمة لا تنتهي
مع تمنياتي لك بالتوفيق
و إن شاء الله في الدالة
Enregistrer un commentaire