من يشاهدون لا عرفوه لا حمار لا قرد في الأخير ظهر قطاطسي

تفرجت على الحلقة الأخيرة من برنامج هذا أنا وبصراحة البرنامج أصبح مهزلة بأتم معني الكلمة وخاصة في غياب ضيف من العيار الثقيل. في حلقة البارح كان الضيف جمال المداني إللي أصبح ينظر ويهز من الجابية ويحط في لخابية وقالك الإنسان المنظم في حياتو هو إنسان ألي ويعيش في حياة ميكانيكية و أنا نقولوا فاقد الشيء لا يعطيه. أما في خصوص المدعو علاء الشابي فهو مطالب بصراحة بالإعداد بجدية أكبر للأسئلة متاعوا باش يبتعد على الأسئلة من قبيل شنوة يعجبك في المرأة وماهو الفرق بين الذكاء والغباء ويرد عيه الضيف ويقولوا من ظن أنه اذكي الناس فهو غبي يظهرلي فيه مغروم بالكتب متاع الأقوال المأثورة. أما أعز لقطة وقت إللي سي جمال المداني قال إللي هو يعشق الليل والسهر قام علاء قالوا مالا إنتي كيف القطوس بكل صحة رقعة وقلة تربية وكيف السيد ظهر رخيص قالوا إلا أنا برجي الصيني هو القط هنا شاخ علاء وقالوا ما لا إنت قطاطسي وأعقبها بضحكة إهتزت لها منطقة شطرانة 2 وشعر بها متساكنوا منطقة بومهل البساتين. أما قمة الإبداع وقت إللي سي جمال المداني قال إللي هو مايتفرج في التلفزة كان كيف يبدى ما عندوا ما يعمل وهو أغلب الحال وإلا وقت إللي يبدا متأزم نفسيا وهنا قالوا علاء حرفيا: ياخي من يشاهدون التلفاز معقدون. تعرفوا هذه على وزن أكلوني البراغيث لو كان جات الدنيا دنيا ياكل عليها عشرة ضربات على صوابعوا يا حسرة وقت إللي كانت كل غلطة متاع نحو وصرف عندها تعريفة وبالمناسبة أعلى تعريفة هي في رسم تاء الفعل مغلقة. هذا دون ذكر المذيعة هالة الذوادي إللي معاه وإللي عندها بحة في صوتها وماشي في بالها البحةعاطيتها وهرة ونحب نعرف علاش يبعثوا فيها في برنامج المسامح كريم باش تبلغ الإستدعاءات وبيناتنا هذاكا مستواها نتذكر مرة جاء المغني المصري خالد عجاج لتونس باش يغني في مهرجان بنزرت ما لقت ما تسألوا قالتلوا تعرف شنوة معنتها لقبك بالتونسي بره الله يعججها في وجهك إن شاء الله. في الختام يا جماعة نحط إيديا ونكمل نلحق ساقيا الزوز في النار لو كان الأنسة إللي تظهر مع علاء في برنامج المسامح كريم موش داخلة القناة بالواسطة والأكتاف أو أشياء أخري وهي نهار الكل الله غالب علاء وجملتين على بعضهم ما تنجمش تقولهم بصراحة ينطبق عيها المثل القائل كوني جميلة وأصمتي

الوصفة السحرية لتحديث الوظيفة العمومية

في رده على أسئلة النواب حول الوظيفة العمومية أجاب الوزير المعتمد لدي الوزير الأول المكلف بالوظيفة العمومية إلي أنه سيتم مستقبلا ربط التسميات بالتكوين والجدارة وبالتالي ثمة إقرار ضمني أنو الترقية حاليا لا تخضع للتكوين والجدارة وباش الواحد ما يكونش قاسي على الوظيفة العمومية متاعنا نقولوا في أغلب الأحيان لاتخضع على خاطر بصراحة ثمة عباد ترقات ووصلت بالجدارة متاعها وموش لازم نعمموا. إللي نحب نقولوا زعمة يلزم إستشارة كاملة حول تحديث الوظيفة العمومية باش نعرفوا إللي الترقيات لاتخضع للجدارة والتكوين.وإذا كان موش من إفرازات الإستشارة يعني نعرفوا الخلل وساكتين عليه وهو أدهي وأمر. في خصوص الوظيفة العمومية حسب رأيي الحل يكمن في ضبط الخطط ووصفها يعني السيد إللي نقولوا عليه مثلا رئيس مصلحة المتابعة شنوة يعمل بالضبط وقتاش يتابع وشنوة يتابع يعني كيما في القطاع الخاص بالضبط نعملوا دليل إجراءات ويتم وصف الخطة وألأنشطة إللي يقوم بيها شاغل الخطة ثم في مرحلة ثانية نقوم بضبط المؤهلات الواجب توفرها في شاغل الخطة وبعد القيام بها الدراسة نطبقوا الدليل على واقع الوظيفة العمومية الحالي ونأكدلكم إلا ما نلقاو كوارث من قبيل مدير الشؤون القانونية موش قاري قانون وإلا مدير الموارد البشرية ما عندوا حتى علاقة بالموارد البشرية . لو كان نوصلوا نعملوا الشيء هذا يعني في النهاية الرجل المناسب في المكان المناسب صدقوني البقية الكل تجي بطبيعتها . شنوة قولكم يا معشر المدونين والمدونات

تفعيل العجز العربي المشترك

أطفال غزة أطفال كبقية الأطفال ونسائهم ورجالهم كبقية النساء والرجال ولكن معاناتهم وأهاتهم لا تحرك السواكن ما أحلانا ونحن نشاهد كل ليلة من وراء التلفاز تطورات الموقف هذا إن شاهدنا ثمة من يقول بالله بدل علينا خللي ها الفم يتعدى وكل قدير وقدرو ووسائل إعلامنا تتناقش عن مسؤولية إنهيار جدار في ملعب القصرين وصعود حارس النادي الصفاقسي على العارضة الافقية في ملعب سوسة. لأطفال غزة أقول ستكونون جيل التحرير إن شاء الله

...

هي تشخر وزادت بف........

في ظل توالي المناسبات العائلية وارتفاع نسق الإنفاق وفي إنتظار مصروف العيد وبصراحة العباد الكل تشدها من خشمها تتطلع روحها تطل علينا مناسبة إنفاق الواحد ما يفيق بيها كان ما يهدوا عليه وهي المساهمة في صندوق التضامن الوطني 26/26. المناسبة هذه في الحقيقة فرصة لإبراز الحس التضامني عند المواطن التونسي والمساهمة في فك عزلة بعض المناطق وربطها بالتجهيزات الأساسية هذاك علاش تعمل ها الصندوق وأنا بصراحة مع تشجيع قيم التضامن والتازرأما بصراحة نلاحظ وأنو الفكرة وإن كانت نبيلة إلا أنها بصراحة ولات تقلق برشة عباد على خاطر المساهمة في الصندوق هي في الأصل عمل تطوعي وبالتالي كل واحد وظروفوا وكل واحد يدفع ما تيسر لكن تبين وأنو العملية أصبحت وجوبية من ناحية العباد الكل تدفع وفما أشكون يقص من المرتب مباشرة وحتى العملة إللي تحل عليهم الصدقة يدفعوا وهذا بصراحة موش معقول بتاتا تصور واحد يساهم ب500 مليم ظاهر السيد منحيهم من فطوروا وإلا قعد نهارتها من غير فطور جملة ومن ناحية أخري يتم تحديد المبالغ خاصة للمتمتعين بخطط وظيفية وهي مبالغ لا تقل عن 30 دينارا وهذا ما يخلي أغلب الموظفين وإللي هوما الكلهم وإلا أغلبهم متسلفين فلوس سواء من البانكة أو من عند الأصحاب وبالتالي عمرها الشهرية ما توصل كاملة يصابون بحالة من الفزع والجزع لهذا الموعد ومنهم من يضطر للإقتراض من زميل العمل للمساهمة في هذا اليوم. كما أن إعتماد قائمات إسمية يقابلها مبلغ المساهمة بصراحة ما هوش لائق راهو العباد الكل موش فرد ظروف وكيف ما قلنا هو عمل تطوعي وبالتالي كل إشهار للأسماء والمبالغ يتنافي مع الهدف الاساسي من العملية ككل. ظاهرة أخري وهو التنافس بين ا والإدارات والمؤسسات أشكون يتبرع أكثر من غيرو وإللي يلم أكثر فلوس يعتبر خدام وذو كفاءة عالية وبالتالي يخدم في خدمتوا ولو كان على ظهور العاملين معاه وبالمناسبة نعرف عباد يجدون أنفسهم مطالبين بالتبرع لثلاث أو أربع جهات. مخ االهدرة لا زم المساهمة في الصندوق الوطني للتضامن تبقي تطوعية ولمن عندو قدرة مادية موش لازم العباد الكل تعرفك قداش عطيت راهو المن يذهب أجر الصدقة والعباد الكل تبدا تفشلم على بعضها وهوما في قرارة أنفسهم لو كان ما جاتش قائمات وإعتبارات أخرى والله نحلف عليهم على طول العام ما يخرج حتى فرنك بعنوان صدقة وشوف الزكاة سمع بيها وإلا لا. من جهة أخري موش لازم بصراحة نربطوها بيوم معين نخلوها على طول العام مادم أحنا نقولوا مد تضامني ونحطوا رقم حساب والله لا يضيع أجر المحسنين

العذاب المرير والجهد العسير في تجاوز مفترق برج الوزير

كل يوم صباح هاذيكة هي المعبوكة. مفترق برج الوزيرأصبح يشكل بصراحة نقطة توتر ذات ضغط عالي جدا بالنسبة للقادمين من برج الوزير الشارع الرئيسي إللي يتعدى من قدام مركز الشرطة وإللي ما عادش يدخلوا مباشرة للمفترق ولإنما يلزمهم يرجعوا للخلف ويدخلوا في الشارع الرئيسي متاع التيلكوم والواضح أنو الهدف نبيل ومنعم ورشاد وهو الحد من عدد الطرق المؤدية للمفترق لكن حالة الفوضى الخلاقة إللي نشوفوا فيها كل يوم صباح ما تتكتبش في 4 أسطر يلزم الواحد يطلع فوق التيلكوم ويصور. بالمناسبة نحب نعرف علاش ما ثماش مدخل للطريق السريعة من جهة النفق الصغير الخاص بمتساكني حي الهادي نويرة شنوة المانع. والله ساعة ساعة نقول شماتة ومادام وزارة التجهيز والإسكان مازال ما لقاتش الحل لمفترق برج الوزير أعتقد أنو الحل الوحيد يكمن في أنوا أحد الوزراء بإعتباروا حيهم يسكن في الحي هذا ونزيد نقترح بعد إذن السادة الوزراء أن يكون سي الوزير لقبوا الوزيرباش يحس روحو في دارو وثمة في التشكيلة الحكومية الحالية عضو حكومة لقبوا الوزير ونطبقوا بالمناسبة قاعدة الرجل المناسب في المكان المناسب.بالمناسبة بالله لوخيان إللي يعرفوا سر تسمية برج الوزير بهذا الإسم ينورونا

عندك في الهم ما تختار

دخلت الأم غرفة ابنتهاووجدت رسالة على السرير فقرأتها بيدين مرتجفتين وكان مضمون الرسالة كالتالي :- أمي الحبيبة بندم وأسف شديد أخبرك أنني هربت مع صديقي الجديد وجدت معه الحب الحقيقي وهو لطيف جدا بالرغم من الحلقات التي يضعها في أذنيه وأنفه والاوشمة الكثيرة على جسمه ودراجته الكبيرة وليس هذا فقط ماما... فأنا أيضا حامل!وهو يقول لي أننا سنكون سعيدين جدا في الحياة كما قررنا انا و هوالعيش معا في الغابة ويريد أنجاب الكثير من الأولاد معي وهذه أحد أحلامي. لقد أخبرني أن الحشيش لا يؤذي وسنزرعه من أجل أصدقاءنا الذين سيهدوننا الكوكايين واطمئني يا أمي نحن نصلي و ندعوا أن يجد العلماء دواء للإيدز من أجل حبيبي فهو يستحق.

لا تقلقي أنا عمري 15 سنة الآن وأنا أعلم كيف أعتني بنفسي يوم ما سأزورك لتتعرفي على أحفادك

ملاحظة : ماما أنا أمزح أنا عند الجيران فقط أردت أن أريك أنه يوجد في الحياة أمور أسوأ من نتائج الاختبارات...

وتقرير المدرسة موجود على طاولتي

إذا عطاك العاطي لا تشاطي لا تباطي وإذا ما عطاكش شارك في لجنة تحكيم مهرجان دمشق الدولي للسينما

مثل خبر إختيار

التونسية منال عمارة لعضوية لجنة التحكيم فية مهرجان دمشق الدولي للسينما خيبة أمل كبرى بالنسبة لي.وإستعملت لفظ التونسية لوصف منال عمارة لأنه يصعب تصنيفها كممثلة سينمائية حيث في رصيدها ظهور في فيلميين في أدوار ثانوية جدا بالإضافة لمسلسل يتيم ومشاركة في تنشيط سهرة الأحد مع تقديم مجموعة من العروض الموسيقية في المطاعم والملاهي. بصراحة هال بمثل هذه المسييرة تكون عضوة في لجنة تحكيم لتققيم مخرجين وممثلين إحترفوا السينما قبل ولادة منال عمارة أصلا. بصراحة الطفلة عندها القبول ومزيانة لكن بعيدة تمام البعد عن الإحتراف وفي سنتين جربت تقريبا كل الأنماط الفنية ولم تفلح في أي منها وهو رأي شخصي وبالتالي فكروني في هال المواطنة التونسية بعد 5 سنوات أخري.

كل ما أشيع ويشاع حول مخاطر إستهلاك الفقاع

تابعت ككل التونسيين ظاهرة إنتشار الفقاع السام في بعض مناطق القصرين والكاف وبعض ولايات الشمال الغربي. ولاحظت ككل التونسيين وأن هذه الظاهرة لم يتم تغطيتها إعلاميا بالحجم المطلوب كما أن الجهات الرسمية لم تتخذ أي إجراء رسمي أو غير رسمي وإختارت سياسة ما شاف حد ما سمع حد وما مات حد لكن هيهات الخبر فاح وحصيلة الضحايا إرتفعت. إللي حبيت نقولوا هو يمكن الظاهرة تكون مفاجئة كما تم تفسيرها علميا من خلال نزول كميات هامة من الأمطار مع تواصل إرتفاع درجات الحرارة مما ساهم في بروز الفقاع قبل وقتوا إضافة للتشابه الكبير بين الفقاع السام والصالح للإستهلاك أما المصيبة هو تقديم تفسيرات فيها كثير من الإستبلاه للمواطن التونسي وهو ما تم للأسف في برنامج في دائرة الضوء على قناة حنبعل حيث أشار ممثل وزارة الصحة العمومية إلى أن التدخلات كانت ناجعة وفي الوقت المناسب وتم التنسيق بين مختلف المتدخلين من وزارة صحة وإدارة الغابات وغيرها بل أن الأمور تجاوزت مجرد التدخل السريع لتصل إلى مرحلة إستباق حصول الظاهرة من خلال تأطير إحد طلبة المرحلة الثالثة في موضوع بحث يتعلق بالفقاع تصوروا يا ناس وأنا متأكد أنو السيد إللي إختار الموضوع ما كان ليسمع ببحثه أحد لو لم توجد ظاهرة التسمم وربما كانت الموافقة على بحثه من قبيل المجاملة وغياب مواضيع بديلة ومباغتة عامل الزمن. بصراحة نحيي وزارة الفلاة والصحة على نظرتهم الإستشرافية وبالمناسبة نود تسليط الضوء على مواضيع البحوث القادمة حتى الواحد يحضر روحو من توة. رجائي لبعض المسؤولين راهو موش عيب كيف الواحد يعترف بعنصر المباغتة ويقر بأن التعاطي مع الظاهرة ماكانش في المستوى. راهو الخطوة الأولي باش نصلحوا أغلاطنا هو ضرورة الإعتراف بهذه الأخطاء

بيت العز يا بتنا...إلي إبنتي زينب

بصراحة تمر الأيام والأشهر بسرعة غير عادية بالأمس أكملنا الدراسة وبالأمس تحصلنا على أول مرتب وبالأمس تزوجنا وبالأمس رزقت بإبنتي البكر زينب والامس هنا يقاس بالسنوات. حقيقة الزمن يمر بسرعة وعجلة الأيام تدور غير عابئة بإنشغال الناس عنها. أكملت إبنتي زينب عامها الاول يوم 7 نوفمبر 2008 وكل توافق في التواريخ لا يتحمل الابوين أي مسؤولية فيه. أطفأت زينب أو كما يحلوا لنا مناداتها زينوبة شمعتها الأولي و إعتبارا لكوني غير مقيم مع إبنتي هذه الأيام فقد سعدت بتمكني حضور عيد ميلادها الأول وهنا أقول حقيقة أن الأبناء نعمة ولابد من شكر الله على هذه النعمة. إن شاء الله عيد ميلاد سعيد يا زينوبة وإن شاء الله ربي يعطيك الوقت الطيب وإن شاء الله ربي يقدرني ونعوضلك غيابي إللي إن شاء الله ماعادش يطول أكثر وهو لأسباب مهنية بحتة وبالمناسبة تحية لأم زينب إللي قائمة بدورها كأم على أفضل وجه رغم أنها تعمل .لأسرتي المضيقة أقول نحبكم ونموت عليكم وإن شاء الله ربي يقدرني باش نخليكم أسعد المخلوقات .