manel amara . idha ilmahboul yakoul wiba il3a9il maya3tihalouch

alla gallib mon clavier ma yektibch bil 3arbi. hier soir sur tv7 jabou lilla manel amara bech t9addim disons law7a ginaiya ou mana7kilkoumch 3la mout3at ilfourja ou binetna allah la i5alina fourja. ma 3andi 7atta chay contre cette dame au contraire 7abitt dawrha fi 7ssebet ou 39abett amma birjouiya illi lik lik ouilli 5attik 5attik. ma question é chkoun tab3a hall fannana. cinema masra7 chanson animation presse television . famma chkoun you93ad 3oumrou lkoul yisténa fi fourstou. illi youja3 il9alb akthar anha elle represente la tunisie kima sar fil festival mte3 damas. birjouliya ta3ich arradaa.
un mot concernant chérif alloui. tu a perdu ta credibilité ou birjouliya mass7 rou93tikk é je termine par si lam testa7i if33al ma chietta.

مثال حي على إللي يكذب كذبة ويصدقها أو شكار روحو كان هوني

كان للخبر الذي انفردت «الشروق» بنشره والمتعلق بتلقي مدرب النادي الافريقي عبد الحق بن شيخة عرضا لتدريب الأهلي المصري صداه في صحيفة «الشروق أون لاين» الجزائرية التي كثيرا ما تعتمد على صحيفتنا في تلقف الأخبار لمعرفتها بمدى مصداقيتها وقد جاء في الصحيفة الجزائرية ما يلي «كشفت مصادر إعلامية تونسية أن عبد الحق بن شيخة المدرب الجزائري تلقى عرضا لتدريب نادي الأهلي المصري خلفا للمدرب البرتغالي مانويل جوزيه الذي انتهى عقده مع النادي المصري العريق».

شنوة قولكم في رائعة يجلس الأولاد أمام الحانوت

أمس وفي حدود الساعة الثامنة والنصف ليلا على ذبذبات إذاعة موزاييك والتي رغم بعض التحفظات عندها بعض البرامج المقبولة ومن بينها برنامج ذكريات وإن شاء الله تكون الترجمة صحيحة. البرنامج هذا يجيب مستمعين ويعطيهم أسئلة تتعلق بالبرامج الدراسية متاع السنة التاسعة أساسي مثلا ويشوف شنية الإجابة متاعهم وإلا يقوللهم كيفاش نكتبوا الكلمة هاذي . مخ الهدرة البارح وأنا في السيارة جابوا مستمعة من بنزرت قدمت روحها على أساس أنها مجازة في اللغة والأداب العربية. سألها المنشط سؤال وقاللها حول الجملة الفعلية التالية إلى جملة إسمية وإليكم الجملة :

جلس الأولاد أمام الحانوت

وهنا كانت الطامة الكبرى لم تتمكن الأستاذة من الإجابة ولم تقدم حتى مجرد محاولة وما نكذبش عليكم يا جماعة صدمت وأصبت بخيبة أمل كبرى والأدهى والأمر وأنها تضحك وما علابالهاش جملة. بالله بيناتنا معقول الشيء هاذا. وزادت دخلتها في حيط وقت إللى زادها سؤال ثان للتدارك زعمة زعمة وإليكم السؤال:

صرف فعل أينع في الأمر

وهنا قطعت المجازة في اللغة والأداب العربية المكالمة تجنبا لمزيد الفضائح وحسنا فعلت. القسم على ربي والله يصبر صغارنا شنوة يستنا فيهم. ملاحظة هامة نعرف إللى الأساتذة والمعلمين متاعنا فى نسبة هامة منهم ذوو كفاءة عالية أما موش معقول وموش مقبول أنو أستاذ ما يعرفش يحول جملة فعلة إلى جملة إسمية. شنوة قراوها في الثانوي وفي الجامعة وكيفاش وصلت.

الله لا تفضحنا يا ربي

في خضم الأزمة المالية االعالمية سروال تونسي ب25 ألف دولار

بعد أكبر قصعة كسكسي وأطول مدلك متاع عصيدة وأطول عصبانة هاهو أطول سروال في العالم .
طولو 50 ميترووعرضو 30 ميتروالفتحة متاع السلسلة (البراغات) 8 ميترو يا بو قلب أش يدخل واحد سكانيا وإلا تمساح.
وكلا 1600 ميترمن القماش وتكلف ب 25 ألف دولار. بالله لو كان عملوا بيهم سراول عاديين زعمة قداش يكسوا من عبد. وهوما صرفوا صرفوا عملوه على الأقل سروال عربي يعنى باللية أو سروال عبد الرحمان لمن يعرف عبدالرحمان على الاقل نقيدوها هوية ومحافظة على التراث ويتبناها الديوان الوطني التونسي للسياحة ونوظفوها.

بصراحة كللى شوق للرقم القياسي الموالي وإن شاء الله ما يكونش في بعض الملابس الداخلية أو بعض الحاجيات البشرية وإن شاء الله ربي يبقى علينا الستر

إن لم تستحي فإفعل ما شئت. عاجل إلى كريم شعيب.

تفرجت يوم السبت في سهرية الليلة ليلة مع عفاف الغربي و من سوء حظي التعيس أنو كان سي كريم شعيب ضيف الحصة يا جماعة بدون مبالغة لابس سورية محلولة لصرتو وهاك القازون مزين الارضية والله شيء يعمل العار راهو موش معقول اليوم يحل السورية غدوة يهبط السروال.جهاز التلفزو راهوا جهاز خطير وثمة ظوابط أخلاقية لابد من إحترامها. ياخي هذا النموذج إللي نحبوا نعدوه إلى أولادنا والله عيب. يبقى من ناحية الصوت قيمة ثابتة لكن كل حاجة في بلاصتها.

السيدة نوال غشام وبيناتنا والله ما نعرف الوضعية متاعها بالظبط ليلة السبت في حنبعل ويوم الأحد في تونس 7 في برنامج سيء الذكر سفيان شوما ناقص كان نستدعاها تتعشى بحذايا الليلة

مالا حرفية

نماذج من الحرفية في صحيفة الصباح التونسية

بربي أعملوا طلة على العنوان متاع المقال وعلى محتوى المقال. العنوان فيه سؤال زعمة علاش كمال إيدير مشي لإيطاليا وفجأة ردوا بالكم ونتصور تعرفوا شنوة معناها فجأة . الراجل مدير عام راهو . أنا بيناتنا مشى في بالي الحكاية فيها ملاعبي كبير وإلا صفقة متاع دواء ربي يفرج عليا وعليكم إن شاء الله. ثم بكل بساطة يقولك مشى في مهمة عمل والادهى والأمر أنو يقولك موش
هذا المهم. شنوة قولكم في المهم في إنتظار الاهم

لماذا سافر كمال ايدير فجأة الى ايطاليا.. ؟

.. سافر رئيس النادي الافريقي كمال ايدير فجأة الى ايطاليا لسبب مهني لمدة يومين وينتظر ان يعود هذا المساء الى تونس، وليس هذا هو المهم بل ان ما نريد قوله هو ان هناك اجتماعا هاما للهيئة المديرة قد يلتئم غدا للنظر في عدة ملفات عالقة كالمدرب بعد الاتفاق مع عبد الحق
بن شيخة ولو ان هذا الاخير تلقى عروضا عديدة من كل حدب وصوب وبإغراءات مالية كبيرة




الله يرحمك يا سي الحبيب شيخ روحو وبيناتنا توا عرفت سر تسمية شيخ روحو.

عفوا سيدي مدير المعهد الاعلى للفنون والحرف

أمس وفي حدود الساعة السابعة والنصف مساء وفي طريق العودة للمنزل كنت بصدد الإستماع إلى إذاعة المنستير . وكان البرنامج يتعلق بالتشغيل ودور منظومة التربية والتكوين والتعليم العالي في هذا الإطار وكان الحوار بين منشطة البرنامج والسيد مدير المعهد الاعلى للفنون والحرف وهذا متاكد منو ولكن مانيش مأكد وأنو المعهد متاع المنستير ولو أنو أغلب الظن باش ما نظلمش العباد. المذيعة تسأل سؤال بدا لي وجيه وهو ما الفرق بين المعاهد العليا للفنون والحرف ومراكز التكوين المهني التي تكون في نفس المجال فكانت إجابة السيد المدير مخجلة حيث أشار إلى أن التكوين المهني يقدم تكوينا لفئة معينة من الشباب في مستوى معين ليصبحوا عملة مختصيين في حين التعليم العالى يختص أكثر في مجال الخلق والإبتكاروالتصميم. ماشاء الله على الثقافة والنباهة . ماعادش نلوموا على المواطن العادى إللى ينظر نظرة خايبة ودونية للتكوين المهني . نحب نرد على السيد المدير ونقدم بعض الملاحظات.

• مراكز التكوين المهني تكون في مستويات التقني السامي وهو مستوى يشترط وجوبا الحصول على شهادة الباكالوريا وبالتالي كيفو كيف المعهد الأعلى.
• التكوين المهني يكون بطريقة التداول ومعناها التكوين بين المركز والمؤسسة باش نبعدو على الطابع النظري وتوا توا ولاو في التعليم العالي يحكوا على تفتح الجامعة على محيطها والشراكة مع المؤسسة.

ونختم ونقولوا للسيد المدير إللي جائزة رئيس الجمهورية في مجال الإبتكار في الصناعات التقليدية في اليوم الوطني للباس التقليدى في دورته الاخيرة تحصل عليها المركز القطاعي للتكوين في الإكساء بمنوبة وبالتالي موش معقول إنسان باش يعمل إشهار للمؤسسة والقطاع متاعو يضرب قطاع أخر كان عليه أن يشير إلى التكامل بين مكونات منظومة الموارد البشرية وما ثماش حاجة خير من حاجة وإنما تبقى مسألة إختيارات على خاطر السيد المدير دوروا حساس جدا وتأثيروا كبير على العباد وما يقول كلمة كان ما يكون على بينة على كل حال نقول الجهل مصيبة وربي إن شاء الله يصلح حالنا

إلى معشر المدونين والمدونين رجاء بعض المعلومات حول مستقبل منطقة النخيلات

يا سادة يا مادة يثيتني ويثبتكم على الشهادة كيما تعرفوا إللى الحصول على مسكن يمثل حلم كل شاب تونسي وبالمناسبة ما نعرفش علاش الإحصائيات تقول إللي أكثر من 80 بالمائة من التونسيين مالكين ويظهرلي هذا معدل معناها إللى عندو عشرة مساكن يخرجوا في الإحصائيات 10 مواطنين مالكين. على كل حال حرت وحار دليلي وأنا محسوب حوم تونس الكبرى درتها باش نشري دار حاضرة ويا خويا بصراحة الاسوام ما تتقربش وكمل معرض الشرقسة كمل على ما بيا ثمة باعث عقاري في جهة قرطاج وإلا البحيرة يقدم المتر مربع المغطي ب2000 دينار يا بورب وبالله كل واحد يحسب قداش يفضل في الشهر وقداش يلزموا باش يكسب ميترو مربع اللطف. أما هذا ما ينفيش أنو المعدل بين 900 و1100 دينار بالنسبة للبقية. أنا بصراحة صرفت النظر على إقتناء الحاضر خاصة وأني نحب نشري فيلا على خاطر العائلة تبارك الله وماشاء الله. مخ الهدرة نصحوني جماعة بمنطقة النخيلات وفي وقت قياسي خدمت الريزوات ولقيت حويجة على الطريق الرئيسي بجانب حي الاساتذة لمن يعرف المكان. هو بصراحة من ناحية حركة المرور والسيولة والإنسياب وما شابهها ما ثماش مشكل على خاطر 5 دقائق وتلقى روحك في الطريق السريعة ولكن المشكل وأنو الحي من ناحية البنية التحتية مازال موش مهيأ رغم وجود الماء والتلفون وخدمات التطهير وأكد لى بعض المتساكنين وأنوا المنطقة منطقة مستقبل وستشتعل الاسعار تقريبا بالمناسبة ثمن المتر 100 دينار وكما أشرت فهي تطل على شارع رئيسي وبالتالي يمكن إستغلالها تجاريا مع العلم وأن مساحة قطعة الأرض في حدود 320 متر مربع وهي غير بعيدة عن المركب الرياضى متاع برج الوزير والمعطيات تقول أنه سيم ربط هذا الطريق الذي ينطلق من طريق رواد على مستوى أخر ضوء تقاطع قبل مركب الغزالة ويشق كامل منطقة النخيلات بطريق سكرة نعرف إللى االمشاريع هاذي تنجم تاخوا بالقليل 3 سنوات لكن حبيت نسألكم معشر المدونين والمدونات هل تعتقدون وأن النخيلات منطقة إستثمار في المستقبل القريب وبالتالي الواحد يتوكل يشري مخ الهدرة بجميع المعطيات إللى قدمتها لوكان جيت في بلاصتي تشري وإلا لا مع الملاحظة وأنوا ما عنديش مشكلة في البني بإعتبار عندى شكون ينجم ياقف للمرمة ومتفرغ. هذه جميع المعطيات ونهديلكم في الختام أغنية سيد أحمد حمزة كانك صاحبي دبر عليا