بالرجولية عوج يزوك منو البقر

مقابلة كرة القدم الودية التي جمعت المنتخب التونسي والمنتخب الفرنسي كشفت عدة ملاحظات لا بد من الوقوف عندها. فالهالة الإعلامية التي رافقت هذه المقابلة والإستعدادات تبقي في نظري غير مبررة. فهي ليست المرة الأولي التي نلاقي فيها فرنسا وديا كما أن فرنسا ليست في أحسن أحوالها والجمهور الفرنسي أو لنقل الشعب الفرنسي لم يتفطن لوجود هذه المقابلة إلا حين لا حظ حركات غير عادية في الشوارع وفي محطات القطارات وماذا سنجني من هذه المقابلة بالله عليكم تصوروا أننا لم نترشح لنهائيات كأس إفريقيا كيف كنا سنخوض هذه المقابلة . كل هذه الهالة الإعلامية والتحضيرات وغيرها لمجرد مقابلة ودية في حين يحرز السباح أسامة الملولى على خمس ميداليات في بطولة العالم للسباحة ولم تقع تغطية الحدث من طرف التلفزة التونسية واقتصر الأمر على مشاهد مكررة ومجترة من تتويجه في بيكين . أيهما أجدر بالمتابعة والتغطية وإلا الملولي ما يستحقش صحيح هو كل ما نذكروا الملولي نقولوا إللي هو يدرس بمنحة تونسية وكأنو أخذ أكثر من حظه أو إنتهي دوره بجرد الحصول على ميدالية أولمبية

هذا في خصوص المقابلة ككل أما في خصوص بعض التفاصيل فقد صدمت بلباس المغنية التونسية أمينة ومادامت تونسية موش أنا باش نحيلها الجنسية التونسية أما تحترم التوانسة شنوة هاك اللبسة وهاك الحالة . توا إللي باش تلقي النشيد الفرنسي مستورة أكثر من اللازم وللة أمينة جعلت العائلات التونسية أو أغلبها في إحراج وزادو دخلوها في حيط وقت غطوها بالعلم المفدي. العلم هاك ماتت من أجله العباد وغيرهم يغطوا بيه عوراتها صراحة موش معقول وقت نحبوا نعملوا حاجة من نوع هذا لازم نكونوا محترفين علاش ما تلبسش لبسة تقليدية شبينا ناقصين صناعات تقليدية وتكون مستورة ولقطة إشهارية معبرة. والأدهى والأمر أنو طريقة لإلقائها للنشيد الوطني بما فيه من أخطاء لغوية ونحوية وصرفية أنا واحد من الناس ما عرفتوش نشيدنا ظهرلي كأنها تغني في عاد أبي للدار من عمل النهار أما بالعربي. من المسؤول عن هذه المهازل في كل الحالات بصراحة لابد من لفت النظر

في خصوص عملية التصفير عالنشيد الرسمي الفرنسي فهي عملية غير مقبولة ولو كان لوبان هو رئيس فرنسا وتقديم تبرير من قبيل راهو اللي صفروا هوما مهاجرين عندهم الجنسية الفرنسية وبالتالي فرنسيس في بعضهم وشنوة مدخل تونس راهو يا إما قصر في التفكير ي إما جحود للجميل راهو المهاجرين الفرنسيس يدخلولنا أكثر مللي دخلوا السياحة وبالتالي موش معقول على تصفيرة نتبروا منهم جملة. كذلك القول بكونهم قاموا بالتصفير على خاطر التصريحات العنصرية لبعض السياسيين الفرنسيين وبعض القوانين العنصرية إللي قاموا بتمريرها نقولوا أنوا ثمة أطر وطرق أخري للإحتجاج وبالله يبارك فيكم لا لتسييس الرياضة وما ندخلوش شعبان في رمضان يبارك فيكم.

في خصوص المقابلة ومردود اللاعبين نخلي الحكم للفنيين أما بصراحة كيف العادة شوط ومن بعد يعمل ربي دليل كما أن الخطة الفنية ظهرتلي ياسر حذرة عبي التالي والوسط وستني المنتخب الفرنسي في نصف الملعب متاعنا ةوخلي الظهيرين يطلعوا. تحية شكر خاص للاعب فهد بن خاف الله إللى العباد الكل سبتوا وقت ماجاش لنهائيات كأس إفريقيا على خاطر سي لومار عيطلوا في اخر لحظة وبالتالي فالقرار متاع اللاعب سليم مائة بالمائة وكذلك تحية للاعب إللي تعرض لإنتقادات واسعة فقط على خاطر اللقب متاعوالراقد وهو بالمناسبة أكثر لاعب تونسي يشارك مع فريقوا وهو بالمناسبة ولد الجزير ة ونقولوا إللي يصبر ينال..

نهاركم زين