المردودية الإقتصادية في أبهي مظاهرها

الحلول الفورية للطريق الحزامية

صراحة الموضوع هذا عندي مدة حبيت نكتب عليه أما بصراحة الشيء ما عادش نجم نصبر عليه . الأمر يتعلق بالمردودية الإقتصادية

للطريق الحزامية و المعروفة يظهرلي وما نيش مثبت بالطريق الوطنية عدد8 وإللي تتعدى من مفترقات سكرة برج الوزير رواد. بصراحة بالنظر للكثافة السكانية للأحياء المجاورة فإن عدم وجود منفذ للطريق الحزامية يعتبر غلطة لا تغتفر على مستوى مكونات المشروع. بحيث لا وجود لأي منفذ لهذه الطريق إلا إنطلاقا من مفترق رواد. بالله شنوة إللي يمنع متساكني برج الوزير وخاصة متساكني حي الهادي نويرة من النفاذ لهذه الطريق بعد الخروج مباشرة من النفق. بربي إش مدخلهم لمفترق برج الوزير حي النزهة ومفترق سكرة وما بين الزوز مفترقات يقعد الواحد يتفرج على الطريق الحزامية من غير ما ينجم يستغلها وتشوف التوانسة كيفاش يبدوا يستنبطوا في الحلول إهو واحد طلع على المادة وحصل بالعرض وقبل مفترق برج الوزير العباد تدخل للطريق الحزامية بالسير للوراء والعملية بصراحة تستحق يعدوها في برنامج عجائب وغرائب. علاش كيف نعملوا حاجة ما نعملوهاش على قاعدة.

بين التوتة متاع أريانة وحي التضامن

يا سادة يا مادة الله يدلني ويدلكم للشهادة والعبادة.. يا هل إندرى التوتة المعروفة بالتوتة متاع أريانة تابعة ترابيا لولاية تونس أم لولاية أريانة . نعرف إللي المنطقة هذه تسمي بمنطقة المنزه4 ونعرف أنو المنازه تابعة لولاية أريانة فهل أن التوتة متاع أريانة هي في الأصل التوتة متاع تونس.. وهل أن طريق 7 نوفمبر المعروفة بالروت إيكس هي الفاصلة بين ولاية تونس وولاية أريانة . وفي نفس الإطار ياخي منطقة التضامن تابعة ولاية تونس وإلا أريانة. هي تساؤلات لتصحيح بعض المعلومات إللي تبدو بديهية أما تفتقر للدقة الكافية

صوم مقبول للجميع

إللي عندو الزهر تحطبلوا لرياح

تمة مثل اخر يعبر عل المثال إللي باش نقدمو وهو إللي كاتبلوا ربي الشفاء يعرضو الطبيب في الثنية أما بصراحة المثل هاذا ما عادش يستقيم على خاطر محسوب وين تقبل توا تلقى طبيب . الحالة إللي نحب نحكي عليها اليوم وإللي نعتبرها من قبيل الزهر إللي يكسر الحجر تتعلق بسي محمد على بن جمعة إللي ولا في كل محضر يحضر وحتى في ومضة الحوار مع الشباب قدموهولنا على أساس أنو يمثل نموذج للشاب التونسي الناجح. بصراحة ما عندي حتى إحتراز على شخصو أما بصراحة خاطيه. وباش نكونوا واقعيين لم يقنعني بتاتا في شوفلي حل ومن قبلها في كمنجة سلامة وحتى في الإشهار موش مواتيه وزيد كمل خرج علينا في المسلسل الجديد وما نحبش نحكي عليه على خاطر مازال كيف بدا. سؤال للسادة المدونين بصراحة هل يقنعكم تمثيل سي محمد على بن جمعة وهل من مقارنة بينه وبين لطفي العبدلي مثلا. أنا بصراحة ما أقنعني كان في مسرحية جنون على خاطر الدور يتماشي مع شخصيتوا ومع ملامح وجهو ما نعرفش علاش الدور الوحيد إللي يواتيه هو دور الإنسان المريض نفسانيا والمختل عقليا وإللي الكابة نازلعليه ومكبشة فيه كيف مرض الروماتيزم عافا الله الجميع.

المثال الثاني يتعلق بمنشط نتصور برشة عباد نساتو على قد ماهو متألق وهوسي كريم العوادي إللي مازال كان نشرة الأنباء ما عدهاش من المنوعات للمهرجانات للفكاهة والنافع ربي واخر طلعة دورها برنامج طبخ وجاب زوز طباخة باش يصنفوا وهو يتضومر بيناتهم. وإللي يحب يشبع شبعة ضحك ما عليه كان يتفرج في قناة 21 كل يوم على الساعة الرابعة مساء مع العلم أنو السيد هذا موجود في مؤسسة التلفزة التونسية منذ إنبعاث قناة 21 الحاصيلوا خذا فرصتو وفرصة غيروا وبصراحة ما عندو وين يوصل

شاهية طيبة للجميع

ما خص المشنوق كان ماكلة الحلوى

يوم 16 سبتمبريوافق اليوم العالمي لحماية طبقة الأوزون. يقول القائل ليوم راهو 15 موش 16 سبتمبر نقولوا صحيح أما راني حبيت نفكركم باش تحضروا روحكم باش تحموا غدوة نشاء الله تمشوش تلهيكم العودة المدرسية وصيام رمضان وحلو العيد. راهو حتي طبقة الأوزون عندها علينا حق وهو بيناتنا لوكان موش أحنا لاهيين بيها راهو من هاك العام دخلت في حيط على كل حال بربي كل واحد غدوة يحمي على قوة جهدوا

أنا الفتي النظيف مهذب لطيف.

يعود اليوم تلاميذ المدارس الأساسية والإعدادية والإعدادية التقنية والمعاهد إلى مقاعد الدراسة بعد عطلة إمتدت طيلة ما يربو (ما نعرفش علاش شايخ عليها الكلمة هاذى ها المدة ومعناها ما يناهز) الثلاثة أشهر وبغض النظر عن التحضيرات للعودة المدرسية والمستوى العلمي للتلاميذ وغيرها فإنه يبقى لليوم الأول لدخول المدرسة ذكري خاصة في مخيلة الأغلبية الساحقة وأتصور أن الجميع قد مرت بمخيلته هذه الصورة ولو بشيء من الضبابية. الكلنا محسوب بكينا النهار الأول وحبينا نروحوا لدارنا وفينا شكون هرب وشكون ما دخلش يقرا وقعد يلعب البرة ووقت الفطور يروح لدارهم. على كل حال ما تقعد كان الذكريات وباش نحيروا شوية الذكريات والمؤكد أنو موش لكلنا قرينا فرد وقت وبالتالي نتصور الحنين باش يتحرك في برشة عباد من غير مانطول عليكم هي دعوة لجميع الأخوة المدونين باش يساهموا بأنشودة أو محفوظات حفظها في المدرسة وقاعد يدندن بيها لتوة موش مشكل كان موش متفكرها لكل حتى المطلع يزي وكيف ما يقولوا الفالح يبدا بروحو باش نعطيكم كلمات أنشودة أنا الفتي انظيف :

أنا الفتي النظيف مهذب لطيف

أقوم في الصباح أسعي إلى الفلاح

فأغسل اليدين والوجه والرجلين

أسير نحو القسم بهمة وعزم

لأحفظ العلوم والخلق الكريم

سأنفع بلادي بجدي وإجتهادي

وهذه عناوين بعض المحفوظات الأخري وهي خاصة بالجماعة إللي لحقوا على كتاب هذا أبي مبروك وهذه أمي مريم ودرس الخاص بحرف الهاء ما نعرفش علاش قاعد حافظوا بالحرف وهو كالاتي : من بالباب ياهدي إنه عمي

الهادي جاء ليسهر أدخليه للبهو

أنا وسلوى وهناء وحافظ إبن خالتي

أم الحمام مرة

ذهب الليل طلع الفجر والعصفور سوسو

لقيتها ليتني ما كنت ألقاها

سقف بيتي حديد ركن بيتي حجر

وغيرها من الاناشيد.

بدون تعليق. يحدث في لبنان

بربي يا جماعة ياخي الأطباء هاذوما عندهم قسم خاص بيهم. موش مستعرفين بقسم هيبوقراط. بصراحة موش . معقول نوصلوا للدرجة هاذي من التفرقة والجهل. الحصيلو ربي يبقي الستر وبره. تصوروا الواحد باش يدخل للطبيب يلزموا نسخة من بطاقة التعريف ونسخة من مضمون الولادة وإذا كانت حالة إستعجالية يظهرلي يشوف لقب العائلة فقط. بصراحة فمة حاجات معقولة في إطار حماية حقوق الأقليات أما باش تكون تفرقة في المجال الطبي بين أقليات تنتمي إلى بلد واحد(لبنان) بصراحة الواحد ما ينجم يقول كان يا دنيا عليك السلام. أين الجانب الأخلاقي

منظمة الدفاع عن المستهلك: خير وسيلة للدفاع هي الهجوم

تعتبر منظمة الدفاع عن المستهلك إعتبار حتى من التسمية متاعها المنظمة إللي تدافع عل المستهلك وهي بالتالي تدافع على المستهلك الأجير والمستهلك المؤجر في نفس الوقت بالإضافة إلى العاملين بالوظيفة العمومية والمؤسسات العمومية الإدارية وغير الإدارية وبالتالي التمثيلية متاع الجمعية هذيا تشمل جميع الفئات والطبقات ولو كان جت الدنيا دنيا راهي المنظمة هذه هي إللي تفاوض على الزيادات في الإجور إنطلاقا من معرفتها بالقدرة الشرائية متاع منظوريها.

لكن ما نلاحظه أن المنظمة هذه رغم أنها تتحصل على دعم قار من ميزانية الدولة يبقى حظورها محتشما جدا والنجاعة والفاعلية متاعها تكاد تكون منعدمة.يقول قائل علاش. حسب رأيي المتواضع أعتقد وأنو صيغة التطوع إللي تعمل بيها المنظمة يلزمها تتطور وهذا الكلام ينطبق على جميع المجالات وخاصة الجمعيات إللي عندها حضور كبير على الساحة على غرار الجمعيات الرياضية وبدا التوجه نحو التخلي عن هذه الصيغة بالنسبة لرؤساء البلديات إللي يفوق عدد سكانها رقم معين على خاطر بصراحة ما ثماش قطوس يصطاد الربي ووين ثمة فلوس الدولة يلزم الإنسان يكون متفرغ. نرجعوا للمنظمة إللى تباركالله عندها مكاتب محلية وجهوية أكثر من بعض الوزارات والمكاتب هذه أغلبها مسكرة والمواطن التونسي بطبيعتوا ما يمشيش للجمعية خللي كيف يمشي ويلقى الباب مسكرما عادش يرجع وتتنتفي علاقة الثقة المفروض توفرها بين الجمعية والمستهلك. كيف تجي تتكلم يقولك راهو العباد إللي شادين المكاتب هذه متطوعين ومضحيين على حساب عائلاتهم وصحتهم ووقتهم. يا خويا موش في مثل هذه الجمعية نجموا نعملوا على عباد متطوعين. هذا من ناحية من ناحية أخري علاش المنظمة تستني المواطن حتى يجي يشكي علاش ما تتدخلش كيف تبدى ثمة إخلالات واضحة وخروقات كبيرة. توا زعمة جماعة المنظمة ما يمشيوش للبحيرة والنصر والمنار وما يتفرجوش في الأسعار والبيع المشروط والماكينة ما تخدمش ما فمة كان كوكتالات والعصير. إللي نحب نقولوا باش ما نطولش برشة هو أنو الإكتفاء بتسجيل الحضور في البرامج التلفزية وتوجيه الوعظ والإرشاد للمواطن ما عادش يجيب نتيجة وهو عمرو ما جاب نتيجة وبالله ماذابينا لوكان الوجوه تتبدل شوية على خاطر نفس الأشخاص هوما بيدهم ونعرف إللي الإنتخابات داخل المنظمة تشد بعضها مليح ياأخي خطاونامن خطاب المنظمة تعول على وعي المواطن وعي المواطن بربي المواطن يحب أشكون يعديها عليه وإلا يغشو ما شرى من البلاصة هاكي وإلا المنتوج هاك كان ملزوز. الدور الإعلامي متاعها ناقص برشة الواحد مكا يعرفش العناوين متاع المكاتب متاعها وبالتالي لازم يعملو مطويات وإلا ملصقات حائطية في المناطق ذات الحركة الإقتصادية الكثيفة ويعلقوا في مركز البريد ودار الشباب ودار الثقافة وغيرها مع أرقام الهاتف وعلاش ما تنشرش تقرير سنوي على نشاطها وإذا لزم نعملوا نوع من أنواع الإعتماد يعني نصنفوا المحلات بحسب سوابقها مع المنظمة ويمكن الإستعانة بالتقارير متاع فرق المراقبة الإقتصادية المفيد لا بد من التجديد على مستوي الأشخاص وأساليب العمل باش المستهلك يحس روحو مطمان وثمة شكون يحميه وتولي منظمة الدفاع عل المستهلك منظمة موش فوضى خلاقة وإللي عندو المفتاح يحل

كثر الهم يضحك

بصراحة رغم ما أحمله من أفكار عن تراجع مستوى التلاميذ في مادة التعبير الكتابي أو ما تعرف بالإنشاء فلم أكن أتصور أن يصل مستوى تلميذ سنة سادسة أساسي لهذا المستوى ولكم التعليق

الموضوع الأول :يساهم المعلم في خدمة الوطن بصنع الأجيال و انتزاعها من مخالب الجهل.تحدث عن ذلك مبينا أهمية دور المعلم و التلميذ في خدمة الوطن.
التحرير :في عاشية يوم الخميس كنا نحن نساهم مع المعلم في خدمة الوطن بصنع الأجيال و انتزاع من مخالب الجهل.وكان المعلم قد يأتي إلينا بالسلاع و نحن قد نصنع في الأجيال و نبيع فيها و كل يوم يأتي واحد بواحد لكي يشتريا الأجيال و التحف المزركشة.جاء رجل لكي يشتري الأجيال فاشترى خمس جل و أتا بسيارة و أخذ فيها الأجيال و ذهب بها وبعد أن ذهب الرجل الأخر و أتا الرجل الكبير ثم يشتري بسلاع فذهب الى الرجل فلقتا عنده الأجيال فأخذا كمية صغيرة و أتا بسيارة و أخذ فيها السلاع و ذهب.
الموضوع الثاني :قرأت في إحدى الصحف مقالا على لسان طفل يعيش في منطقة أخرى من العالم تحدث فيه عن نفسه.حرر نصا سرديا على لسان هذا الطفل يبرز فيه مختلف الأعمال التي كان يقوم بها و دوره في العائلة.
التحرير :في يوم من الأيام ذهبت إلى السوق فوجدت احد أصدقائي يقرأ صحيفة فأخذتها من عنده و قرأت فيها مقالا يحكي على لسان طفل يعيش في منطقة أخرى من العالم.لكني استغربت من ذلك الأمر و هو كيف يمكن أن يعيش لسان بعيد عن صاحبه، لقد كان هذا اللسان يعمل أعمالا مختلفة في العائلة لكن الطفل كان يعيش بدون لسان مع أفراد عائلته، لقد كان اخرس لا يتكلم لأن لسانه يعيش في منطقة بعيدة عنه إن ذلك الولد غريب حقا و هو إن كان لا يأكل طعامه لأنه فاقد لسانه و قد كان يشرب الحليب و الأشياء التي توكل لأنه ليس قادرا على ابتلاعه بدون لسان، فاللسان بالنسبة للطفل هو الوسيلة التي يبتلع بها الطعام فهو العنصر الأساسي في ابتلاع الطعام و غيره من الأشياء الأخرى من أجل ذلك الطفل قد كان بائس الحال بين أفراد عائلته الذين كانوا هم أيضا حزينون عليه بسبب فقدان لسان.
الموضوع الثالث :شاركت خلال العطلة صحبة العائلة في جني الزيتون فأمضيتم اليوم في العمل.تحدث عن ذلك مبينا جملة الأعمال التي قمتم بها.
التحرير:في يوم من الأيام خلال العطلة شاركت الأسرة في جني الزيتون فأمضينا أوقاتا في العمل.و بينما أبي و أمي و عمي و جدي و خالتي حظروا الفرش و الشكور و الخيش و المنفذ و ركبنه في التركتور و ختفه عمي و ندهه و ركب له الكاتريام، و عندما وصلنا الى الهنشير إذ تنطرت العجلة متاع التركتور و هبت أبي و أمي و جدي و خالتي و أمي و هبت كذلك أنا و هبتنا كذلك الفرش و الشكور و الخيشى و المنفذ و مشى أبي و أمي و جدي و خالتي يجمعون الزيتون.و أنا و عمي ركبنا على التركتور و ختفه و ركب له الديزيام و بعد التروزيام و بعد الكاتريام و بعد السانكيام و عندما وصلنا الى الحداد إذ تنطرت العجلة الأخرى ، وقدهم الحداد العجلتين و عطى عمي الحداد خمسون دينارا ركبت أنا و عمي على التركتور و ختفه عمي و ركب السنكيام و عندما وصلنا إلى الهنشير ألقينا أبي و أمي و جدي و خالتي و عبو عشر شكاير خيشى و في الأخير ركبنا و ندهنا و رجعنا الى البيت فارحين مسرورين.

بربي لولاد أش قولكم في تركتور فيه سانكيام وبربي قولولي زعمة مسؤولية أشكون

هل أتاك حديث قطة أسماء بن عثمان

السلام عليكم

وصلتني أصداء عن برنامج تلفزي يعرض في قناة تونس7 ضمن البرمجة االصيفية وعنوانه نجوم في القايلة وبصراحة هو من عنوانو ظاهر فما إجتهاد كبير أما هاك الإجتهاد متاع الهواة إللى عمرو ما ينجم يتطور وهو من تنشيط سي معز الزرعي وإللي حقو يسموه معز الضحاك. وكان من حسن حظي أني تفرجت على اخر حلقة وكانت مخصصة لأسماء بن عثمان بصراحة بيناتنا هل هي نجمة وما هو رصيدها. من المرسي بدينا نقدفوا زدت وسعت بالي وكملت نتفرج على ددو في الحجامة وهي تحكي على قطوستها وشنوة إسمها وقطوست أختها إللي جابتها مالأمريك ومعز يشكر وددو تقلو توا المسيو يغير أشكرني من بعد. بصراحة مستوى في الحضيض وبرنامج لا عندو لاساس لاراس نتبعوا النجم وهو يوري اش يحب. علاش ما عملوش حلقة على السيد عيسى حراث إللي وراه30 سنة عطاء وفي الأخر االراجل قريب يمد يدو. وفي خصوص سي معز الزرعي بصراحة مع كامل إحتراماتي خاطيه التنشيط والضحك بالطريقة هذيكة موش من باب إدخال المرح والبهجة بل هو من قبيل قلة التربية والأدب .