ياسادة يامادة يثبتني ويثبتكم على الشهادة والعبادة الجمعة إللي فاتت نقرا في جريدة لابراس إللي على فكرة مانيش فاهم علاش إسمها لابراس يا خي الجرايد ووسائل الإعلام الأخرى موش لابراس . موش مشكل وكيف ما تعرفوا سيادتكم وما يخفاش على الجناب وأنوا أعز ما ثمة في لابراس هو البورصة متاع السيارات ومتاع العقارات وبالطبيعة صفحة الوفيات. نطيح بإشهار لمشروع عقاري تابع الباعث العقاري بن محمود وحاطين على بعد 8 كلم من العاصمة وفي المنزه الغربية كل ما تشتهى العين شقق وديبلاكس وفيلات منفردة وفيلا توأم وسامحوني على الترجمة الحرفية وبإعتبار وأني نويت وتوكلت على ربي ونحب نعمل دويرة باش نطلع في قائمة المعهد الوطني للإحصاء و نحسن في نسبة المالكين للمساكن باش نحققوا مع بعضنا أهداف الالفية. أيا سيدي وين تطلع المنزه الغربية هاذية. ماذبية نعملها مسابقة ونعطي زوز ديار غير توأم للي يربح. شد عندك يا سيدي. تكمل الطريق السريعة إللي نعبروا عليها بالروت إكس وتخرج من الدندان والعقبة وتشد طريق باجة أنا بيناتنا شكيت وقلت بالكشي الجماعة غلطوا وهي بعيدة على باجة 8 كم موش على تونس. بصراحة مشيت وياليتني ما مشيت. البقية في الحلقة القادمة على خاطر مازلت مدهشر لتوة
Aucun commentaire:
Enregistrer un commentaire